iPhone用家幾乎人人都有尿袋跟身，舊線唔用得，焗住俾多百幾蚊買條原廠線。 

IGOSSIP

iOS7幫手清舊貨

上年 iPhone 5推出嗰陣，改用傳送速度更快嘅 Lightning cable，當時 Apple標榜每條線都有獨立認證晶片，想充電或過資料，一定要用價值百幾蚊嘅原裝線或取得 Apple認證嘅代用線。點知推出未夠一個月，山寨廠已經破解認證，令到十幾蚊條嘅雜廠線都可以充電過資料，搞到冇人再買貴線。

今次 iOS 7推出，系統加強對 Lightning cable嘅認證，幾乎所有雜廠線都用唔番喺 iOS 7嘅產品上（計埋升咗 firmware嘅 iPhone 5）。呢個時候曾經取得 Apple認證嘅代用線廠商，即刻嗱嗱臨 send新聞稿俾記者，拎番晒之前啲舊貨嚟翻銷，今次真係要多謝 Apple喇。

5G數據做到乜？

用量參考 

有新 iPhone，自然有新玩法，不過唔係講緊部機，而係幾間賣新 iPhone嘅網絡商，其中 1010、 One2Free同數碼通都靜靜雞取消無限上網 plan，每月最多得 5GB（ 5120MB），平均每日得 170MB用，「舊約」嗰陣就算超標後都可以限速繼續玩，「新約」就焗住俾錢買數據量，否則就網都冇得你上，今次認真要慳住使先得。咁，究竟玩乜最燒錢？手機 online game影響唔大，玩半個鐘都係 1MB半 MB之間，真正大食嘅係煲劇、睇 YouTube同串流聽歌，例如每日睇一套標清版 MyTV劇集要 80MB，睇十分鐘標清版 YouTube要 20MB，聽三、四首串流音樂再燒 20MB，一個月咁就冇咗 3.6GB，睇多幾套劇或報紙雜誌真係好易爆。唔想玩到連 WhatsApp都 send唔到，記得裝 3G Watchdog之類嘅數據流量監控 app，用到指定限額就會提醒你。

(繼續閱讀...)